«Junior Eurovision-2020» халықаралық байқауы 29 қарашада өтеді. Қазақстан атынан 12 жастағы әнші Қарақат Башенова қатысады.
Қыркүйекте Қарақат ұлттық іріктеуде жеңіске жетіп, Junior Eurovision байқауына жолдама алды. Іріктеуге Қазақстаннан 12 үміткер қатысқан. Қарақат әкесіне арнап “Forever” әнін орындап, қазылар алқасының оң бағасын алды. «Ән арқылы әкемнің есімін тарихта қалдырғым келеді», — деді жас әнші Dimashnews сайтына берген сұхбатында.
Қарақат — Алматы облысы, Талғар ауданы, Рысқұлов ауылының тумасы. Алматыдағы Күләш Байсейітова атындағы республикалық музыка мектебінде білім алып жүр. Сондай-ақ, бір жарым жыл көлемінде танымал әнші Қарақат Әбілдинамен дайындалған. Жақында халықаралық байқаулардың жеңімпазы Димаш Құдайбергеновпен кездесті. Димаш Қарақаттың өнеріне тәнті екенін айтып, өз кеңестерін берді.
Қарақат Junior Eurovision байқауында Қазақстан намысын қорғайтын үшінші қатысушы болмақ. Бұған дейін халықаралық жарыста 2018 жылы Данэлия Төлешова алтыншы орын, былтыр Ержан Максим екінші орын иеленді.