Режиссер Болат Қалымбетовтың «Мұқағали» көркем фильмі 25-ші Таллинде өткен «Қараңғы түндер» (PÖFF) кинофестивалінде қазылар алқасының сыйлығына ие болды. Бұл туралы фестиваль ұйымдастырушылары кеше «Эстонияның» концерт залында өткен марапаттау рәсімі кезінде хабарлады.
«Поэтикалық тіл және фильмнің көрнекі байлығы ең сезімтал тақырыптарды адам жанының тіліне аударуға мүмкіндік береді. Фильм нағыз рухани құндылықтарды мадақтауға есік ашады», — деп түсіндірді Эстонияның діни ұйымдарының өкілдері кірген қазылар алқасының мүшелері.
Естеріңізге сала кетейік, қазақтың әйгілі ақыны Мұқағали Мақатаевтың 90 жылдығына арналған «Мұқағали» картинасы өмірінің соңғы жылдары туралы баяндайды. Фильмді Қазақстан Мәдениет және спорт министрлігінің тапсырысы бойынша Ш.Айманов атындағы «Қазақфильм» киностудиясы түсірген. Таспаның сценарийін белгілі қазақстандық жазушы Жүсіпбек Қорғасбек режиссер Болат Қалымбетов және Ғазиз Насыровпен бірге жазған. Фильм қазақстандық прокатқа 2021 жылдың 21 қазанында шықты.