2020 қоғамға жаңа өзгерістер әкелуден бөлек, ұмыт бола бастаған үрдістерді қайта жаңғыртты. Бұл, өз кезегінде, сән әлемін де айналып өтпеді. 2000 жылдардың басында танымал болған пэтчворк техникасы қайта жанданды. Мата қалдықтарынан киім жасаудың экологиялық әдісі биыл сәнге айналып отыр. Бұған себеп — пандемия кезіндегі карантин. Локдаун уақытында әбден зеріккен халық ескі киімдеріне эксперимент жасап, оларды барынша жаңартуға тырысқан.
Өңделмеген жиектер мен салақтап шығып тұратын жіптер тренlді ең алғаш 90-шы жылдары Maison Margiela мен XULY Bet топтамаларында пайда болды. Екі бренд те қайта өңделетін мата қолданысымен танымал болған. Сол заманның танымал поп-жұлдыздары Кристина Агилера, Бритни Спирс, Джастин Тимберлейк бастаған бұл сәнді басқа жұлдыздар да тез қоштап кетті.
Бүгінде пэтчворк стиліндегі киімдер шығаратын компаниялар біршама. Олардың қатарында, ерекше дизайнерлік шешімдер ұсынуымен танымал әрі көптің сұранысына ие ASAI мен Eckhaus Latta брендтері де бар.
