Мелания Трамп болашақ бірінші ханым Джил Байденді Ақ үйге экскурсияға шақырмайтыны белгілі болды. 70 жылдық дәстүрге сай қызметінен кеткен президенттің әйелі келесі Президенттің әйелін қарсы алуы керек. Дәл солай төрт жыл бұрын экс-бірінші ханым Мишель Обама Мелания Трамппен Ақ үйде шай ішіп, президенттік резиденцияға экскурсия жасаған болатын.
Ал Дональд Трамп болса, Twitter-дегі парақшасында 20 қаңтарда Джо Байденнің инаугурациясына қатыспайтынын жазды. Осылайша, ол XIX ғасырдан бері келе жатқан рәсімге қатысудан бас тартқан алғашқы президент атанды. Бірақ Билл мен Хиллари Клинтон, Лора мен Джордж Буш, Барак пен Мишель Обама Байденнің инаугурациясына қатысатынын айтты. 
Дәстүр бойынша, Трамптар Ақ үйді АҚШ-тың жаңа президенті Джозеф Байден мен оның әйеліне салтанатты түрде тапсыруы керек болған. Алайда, бұл жолы резиденцияда мемлекет басшысы мен бірінші ханымды әкімшілік қызметкері қарсы алады.