ҚР еңбек сіңірген қайраткері, ақын Шөмішбай Сариев 75 жасқа келген шағында өмірден өтті. Бұл туралы Мәдениет және спорт министрлігінің баспасөз қызметі хабарлады.
“Қазақ поэзиясы мен әдебиетінің алып тұлғасының бірі Шөмішбай ағамыз дүниеден өтті деген суық хабарды естіп, қабырғамыз қайысып отыр. Өлең-сөздің ерен жүйрігі атанған біртуар қаламгердің «Атамекен-ай», «Домбыра», «Дос керек», «Сәлем саған, туған ел!» және көптеген әні өміршеңдігін жоймайды”, — деп жазды министрлік Facebook-те.
Шөмішбай Сариев 1946 жылы 15 сәуірде Қызылорда облысында дүниеге келген. Ақынның “Бозжорға”, “Ғашықтар жыры” авторлық бейнетаспасы жарық көрген. Көзі тірісінде Франц Кафка атындағы халықаралық сыйлықтың лауреаты (2003), «Тарлан» сыйлығының иегері (2004). Қазақстанның еңбек сіңірген қайраткері атанды.