Google Translate мобайл қолданбасы арқылы енді қазақ тілінен дауыстап аударуға болады. Бұл туралы «Ұлттық аударма бюросы» қоғамдық қорының атқарушы директоры Рауан Кенжеханұлы Facebook парақшасында хабарлады.
Оның айтуынша, мұндай нәтижеге жетуге 5 жылдық жұмыс қажет болған.
“Ол үшін Google-ге сан мың бет аударма мәтін, қазақ тіліндегі жүздеген сағат аудио жазба, дыбысталған том-том сөздік бердік. Google аударма қызметі — нейро жүйелер негізінде дамып келе жатқан машиналық аударманың ең ілгерісі. Сондықтан тілді сақтау және оны дамыту тұрғысынан бұл аса маңызды оқиға”, — дейді Рауан Кенжеханұлы.
App Store-дағы Google translate-тегі бұл опция дүйсенбіде шыққан 6.17.0 жаңартуынан кейін қолдануға болатыны жазылған. Енді Google translate 71 тілде дауыс арқылы аударма жасай алады.