“Грэмми” сыйлығының иегері қазақстандық музыкант Иманбек Зейкеновтің (Imanbek) өмірі мен шығармашылығы туралы деректі фильм түсірілуде. Фильм танымал Netflix платформасында көрсетілуі мүмкін. Бұл туралы ресейлік музыка сыншысы Борис Барабанов BaigeNews.kz сайтына берген сұхбатында хабарлады.
Иманбек өзінің жеңісі туралы Мәскеудегі Effective Records лейблінің кеңсесінде болған кезде білді. Ол жерде Борис Барабанов та қатысқан.
«Бұл (марапаттау сәті) ремикс шығарған Effective Records компаниясының кеңсесінде өтті. Ол жерде лейбл мүшелері болды: басшы, әрі менеджер Кирилл, сонымен қатар Иманбек туралы деректі фильм түсіріп жатқан түсірілім тобы. Менің түсінгенімше, олар фильмді Netflix-те шығаруды жоспарлап отыр. Қалай болатынын білмеймін, бірақ бұл туралы әңгіме өте белсенді өтті», — дейді Борис Барабанов басылымға берген сұхбатында.
Еске сала кетсек, қазақстандық музыкант Иманбек Зейкенов (Imanbek) “Roses” туындысы үшін беделді Грэмми (Grammy) сыйлығының “Үздік ремикс” жүлдесін жеңіп алды.