Қазақстандық теннисші Зарина Дияс АҚШ-та өтіп жатқан Miami Open турнирінде әлемнің бұрынғы бірінші ракеткасы, төрт дүркін олимпиада чемпионы америкалық теннисші Винус Уильямсты жеңіп, екінші кезеңге өтті.
Miami Open стартындағы әлемдік рейтиңде 89-шы орында тұрған Зарина Дияс әлемнің 79-шы ракеткасы саналатын 40 жастағы Винус Уильямспен кездесті. Матч 6:2, 7:6 есебімен Диястың пайдасына шешілді. Қазақстандық теннисші бұл ерекше жеңіс екенін атап өтті.
“Мен жеңісіме өте қуаныштымын. Оңай келген жоқ. Мен Винустың өнерін кішкентай кезімнен бақылаймын, ол — аңыз адам. Сондықтан мен үшін бұл ерекше жеңіс”, — дейді Дияс Sportsmax.tv-ге берген сұхбатында.
Miami Open турнирінің екінші айналымында Диас швейцариялық Белинда Бенчичпен (әлемнің 12-ракеткасы) ойнайды. Турнирдің жүлде қоры 3,2 миллион доллардан асады.