Биыл Токиода өтетін Олимпиадаға қазақстандық спортшы Руслан Құрбанов лицензия жеңіп алды. Осылайша, Қазақстан активінде 18 спорт түрі бойынша 45 лицензия бар. Бұл туралы olympic.kz хабарлады.
Лицензия — белгілі бір ел спортшыларының Олимпиада ойындарына қатысу құқығы. Әдетте олимпиада ойындарына лицензия беру туралы шешімді әр спорт түрі бойынша халықаралық одақтар, қауымдастықтар немесе федерациялар қабылдайды.
Қазақстандық спортшылар альпинизм, бокс, үстел теннисі, көркем жүзу, жеңіл атлетика, садақ ату, еркін және грек-рим күресі, стенд ату, су добы, заманауи бессайыс, гимнастика, велоспорт, жүзу, каратэ және семсерлесу сияқты спорт түрлерінде бақ сынаспақ.
Токиодағы Олимпиада ойындары былтыр өтуі керек еді, бірақ пандемияға байланысты шегеріліп, 2021 жылғы 23 шілдеден 8 тамызға аралығында өтетін болды.
Бүгін Жапонияның Фукусима қаласында Токио Олимпиадасының алау эстафетасы басталды. Олимпиада алауы Токио ойындарының ашылу салтанатына дейін 121 күн бойы Жапонияның 47 префектурасын аралайды.