Футболдан Қазақстан чемпионатының үшінші турындағы “Қайрат — Тараз” кездесуінің соңы кикілжіңмен аяқталды, деп хабарлайды vesti.kz.
Матч барысында командалардың бас жаттықтырушылары Алексей Шпилевский мен Вардан Минасян сөзге келіп қалған. Кикілжің 56-минутта “Қайрат” ойыншысы Вагнер Лаваға қатысты фол жасалып, ойын ережесі бұзылғаннан кейін басталған. Шпилевскийдің “Әдейі бізді мықты ойыншылардан айырып жатыр. Мұны қалай түсінуге болады? Өткендегі ойында Артур Шушеначевты сындырған еді”деген сөзіне “Тараз” жаттықтырушысы Минасян: “Ей, сен өз ойыншыларың туралы айт, ойыннан кейін кім екенімді көрсетемін. Ауызыңды жап”, — деп жауап қатқан. Vesti.kz матч эфирінде екі жаттықтырушының сөздері анық естілгенін атап өтті.
Клубтың ресми сайтына берген сұхбатында Шпилевский «төрешілер заңсыздығы жалғасуда» деп мәлімдеп, матч төрешілеріне наразылығын білдірді.
Матчтың өзі 2:2 есебімен аяқталды. Бірінші таймнан кейін алматылықтар қақпасына екі гол соғылды. «Қайрат» осы маусымда бірінші рет ұпай жоғалтқанымен үш турдан кейін жеті ұпай жинап, турнирлік кестедегі көшбасшылығын сақтап қалды.