Мәскеу қаласындағы тергеу комитетінің басқармасы “Eurovision” халықаралық байқауына Ресей атынан қатысатын әнші Манижа Сангиннің “Russian Woman” әнін “өшпенділік” белгілері бар-жоғына тексере бастады, деп хабарлайды Настоящее время.
Ведомствоға өтінішті “Ветеранские вести” ұйымы жолдаған. Оның өкілдері Манижаның сахналық нөмірі “орыс әйелдерінің қадір-қасиетін ұлтқа деген көзқарас негізінде қорлап,төмендетеді” деп санайды.
Ресей президентінің баспасөз хатшысы Дмитрий Песков қоғамдық ұйымдардың сөзсіз “пікір білдіріп, тиісті органдарға жүгінуге құқығы бар” деді, бірақ Кремль үшін бұл тақырып бірінші кезектегі мәселе емес екенін атап өтті.
Бірінші арнада жүзеге асқан көрерменнің дауыс беруі нәтижесінде “2Маши” және Therr Maitz топтарынан Манижа асып түсіп, “Eurovision-2021” халықаралық байқауына қатысуға мүмкіндік алды.
Манижа Сангин 1991 жылы Тәжікстанда дүниеге келген, азаматтық соғысқа байланысты отбасымен 1994 жылы Душанбе қаласынан Ресейге көшіп кеткен.
