Clubhouse қолданушыларға сүйікті авторлары мен спикерлеріне донаттар жіберуге мүмкіндік берді.
“Бұл ақша төлемін тікелей Clubhouse-та жүзеге асыруға мүмкіндік беретін көптеген қызметтердің алғашқысы болмақ”, – делінген компания блогында.
Пайдаланушы төлемді қолдағысы келетін автордың Clubhouse профиліне өтіп жасай алады. Payments функциясы қосылған болса, экранның төменгі жағындағы “ақша жіберу” батырмасын басып, қажетті соманы енгізуге болады. Ақшаны бірінші рет аударғалы жатсаңыз, Clubhouse бағдарламаға несие немесе дебеттік картаны қосуды сұрайды.
“Төлем толықтай контент жасаушыға жіберіледі. Ақша жөнелтетін адамнан эквайриң үшін аз ғана төлем алынады, ол сома төлем өңдейтін серіктесіміз Stripe есебіне тікелей аударылады. Clubhouse мүлдем ақша алмайды”, – делінген компанияның блогында.
Clubhouse негізін қалаушы Пол Дэвисон стартап жарнамасына емес, авторларды тікелей монетизациялауға назар аударғысы келетінін айтты.
