Қазақстандық шахматшы Динара Сәдуақасова facebook парақшасында елдегі интернет нашарлығынан Polgar Challenge халықаралық турнирінде жарыс жолынан шыққанын хабарлады.
“Қымбатты достар, интернеттің тұрақсыздығынан Polgar Challenge турниріне қатысуды тоқтатуға мүжбүр екенімді үлкен өкінішпен хабарлаймын. Турнирге шахмат тұрғысынан да, техникалық жағынан да дайындалдым. Бірақ мен ойнаған 7 партияның әрқайсысында интернет нашар болды”, — деп жазды қазақстандық гроссмейстер.
Динараның сөзінше, оған ойыннан гөрі интернет туралы көбірек ойлануға тура келген. Тіпті үш провайдердің байланысын қолданса да ештеңе көмектеспеген. Осы келеңсіздік үшін Сәдуақасова жанкүйерлер мен ұйымдастырушылардан кешірім сұрады.
Динараның жанкүйерлері бұл мәселеге Цифрлық даму министрлігінің назарын аудару мақсатында “Бағдат Мусин, бізге сенбесеңіз, сенбеңіз! Осы жағдайдан кейін бүкіл елді мекендерде интернетті бақылау маңызды” сынды комменттер жазуда.